Chapter ( 12 )

သူ၏အရင်ဘဝက ဇွန်ဘီဗိုင်းရပ်စ် စတင်ဖြစ်ပွားချိန်တွင် ဤနိုင်ငံသည် အထိနာဆုံး နိုင်ငံများအနက် တစ်ခုဖြစ်ခဲ့သည်။ လူဦးရေ အလွန်အမင်း များပြားရုံသာမက နိုင်ငံတော်၏ ထိန်းချုပ်မှုကလည်း တင်းကျပ်လှသည်။

ကြမ်းကြုတ်လှသော ဇွန်ဘီများ၏ ရှေ့မှောက်တွင် တရုတ်ပြည်သူတို့၏ လက်နက်မှာ မီးဖိုချောင်သုံးဓားနှင့် အိုးခွက်ပန်းကန်များသာ ရှိခဲ့သဖြင့် ပြန်လည်ခုခံနိုင်စွမ်း လုံးဝမရှိခဲ့ကြပေ။

ထို့နောက်ပိုင်းတွင် အစိုးရက စစ်တပ်များစေလွှတ်၍ အစွမ်းကုန် နှိမ်နင်းခဲ့သော်လည်း၊ မောပန်းနွမ်းနယ်ခြင်း မရှိသော ဇွန်ဘီစစ်တပ်ကြီး၏ရှေ့တွင် သူတို့၏ ကြိုးပမ်းမှုမှာ သမုဒ္ဒရာထဲသို့ ရေတစ်စက် ချလိုက်သကဲ့သို့သာ ဖြစ်ပြီး အကျအဆုံး အလွန်များပြားခဲ့သည်။

မြို့ပြများမှ လွတ်မြောက်လာသော အသက်ရှင်ကျန်ရစ်သူမှာ အလွန်နည်းပါးခဲ့ပြီး အရေးပါသော အရာရှိကြီး အများအပြားမှာလည်း ကမ္ဘာပျက်စောစောပိုင်းတွင် သေဆုံးကုန်ကြသဖြင့် နိုင်ငံတော်မှာ အပိုင်းပိုင်း ပြိုကွဲပျက်စီးကာ လူမှုစနစ်များလည်း ခဏချင်းအတွင်း ပြိုလဲသွားခဲ့ရသည်။

ထိုအကြောင်းများကြောင့်ပင် ကမ္ဘာပျက်နှောင်းပိုင်းကာလ၌ တရုတ်လူမျိုးတို့မှာ ကပ်ဘေး၏ ရက်စက်မှုကို ခံစားရရုံသာမက အချို့သော နိုင်ငံခြားသားများ၏ နှိမ်ချဆက်ဆံမှုနှင့် ဖိနှိပ်မှုများကိုပါ ရင်ဆိုင်ခဲ့ကြရသည်။

အကယ်၍ ယခုတစ်ကြိမ်တွင် နိုင်ငံတော်က ကြိုတင်ပြင်ဆင်မှုများ ပြုလုပ်နိုင်ခဲ့လျှင် အခြေအနေမှာ ဧကန်မုချ ကွဲပြားသွားပေလိမ့်မည်။ အစိုးရအနေဖြင့် ဤအမည်မဖော်လိုသောစာကို ယုံကြည်ခြင်း ရှိ၊ မရှိမှာမူ ချူးဟွေ့အနေဖြင့် သူ တတ်နိုင်သမျှကိုသာ လုပ်ဆောင်ပေးနိုင်ပေသည်။

သို့သော်လည်း သူ၏ သတိပေးစာပါ အကြောင်းအရာများကို ကြားသိရသောအခါ ယွမ်ဟိုလင်းက သူ့ကို အရူးတစ်ယောက်ကဲ့သို့ ကြည့်လာ၏။

ယခုအချိန်တွင် ကမ္ဘာပျက်ကပ်ကြီး ကျရောက်တော့မည့် လက္ခဏာ တစ်ခုမျှ မရှိသေးပေ။ မကြာမီ ကပ်ဘေးကြီး ဆိုက်ရောက်တော့မည်ဆိုသည်ကို မည်သူက ယုံမည်နည်း။ ဤစာမှာ နောက်ပြောင်သည့် စာတစ်စောင်မျှသာ ဖြစ်မည် မဟုတ်ပါလား။

သို့သော် ချူးဟွေ့၏ အမူအရာကို ကြည့်ရသည်မှာမူ နောက်ပြောင်နေပုံ မရပေ။ ထိုစာထဲတွင် နောင်နှစ်၌ ကပ်ဘေးကြီး ကျရောက်မည်ဟု ဖော်ပြထားရုံသာမက နောက်လာမည့် လအနည်းငယ်အတွင်း ဖြစ်ပွားမည့် အဓိက ဖြစ်ရပ်ကြီးအချို့ကိုပါ ကြိုတင်ဟောကိန်း ထုတ်ထားသေး၏။

ယွမ်ဟိုလင်းသည် ၎င်းကို နောက်ပြောင်မှုဟု ထင်နေသော်လည်း တစ်ဖက်တွင်မူ အံ့သြစရာကောင်းလောက်အောင် ယုံကြည်ချင်စိတ်များ ဖြစ်ပေါ်နေမိသည်။

ချူးဟွေ့ကလည်း အများကြီး ရှင်းပြမနေတော့ဘဲ သူ့ကိုယ်သူ လျှို့ဝှက်ဆန်းကြယ်သော ဗေဒင်ဆရာတစ်ဦးကဲ့သို့ ပုံဖော်လိုက်သည်။

"မစ္စတာယွမ်၊ အံ့သြမနေပါနဲ့။ သတင်းတွေကိုသာ စောင့်ကြည့်ရင်း ကျွန်တော်ပြောတာကို မှတ်ထားလိုက်ပါ။ နတ်ဘုရားတွေက ခင်ဗျားကို လှည့်ဖြားဖို့ အစီအစဉ်မရှိဘူး။ ရှေ့လာမယ့် လအနည်းငယ်အတွင်းက သတင်းတွေကို သတိထားကြည့်ပါ။ ဒါ့အပြင် မစ္စတာယွမ်... ခင်ဗျားရဲ့ မျက်ခုံးနှစ်ခုကြားက ယင်ထန် အမှတ်က မည်းမှောင်နေတယ်။ မကြာခင်မှာ ခင်ဗျား ထောင်ကျကိန်း ရှိနေတယ်။ ကျွန်တော့်ကို ယုံပြီး ကျွန်တော်နဲ့ အရောင်းအဝယ်ကို အောင်မြင်အောင် လုပ်မယ်ဆိုရင်တော့ ဒီမစ်ရှင်ကနေ အမြန်နုတ်ထွက်ပြီး ဒီလမကုန်ခင်မှာ တရုတ်ပြည်ကို ပြန်သွားတာ အကောင်းဆုံးပဲ"

ချူးဟွေ့သည် ဗေဒင်ပညာရပ်ကို နားမလည်သော်လည်း ရုပ်ရှင်များစွာ ကြည့်ဖူးသဖြင့် တတ်ယောင်ကား လုပ်လိုက်ခြင်းသာ ဖြစ်သည်။ သို့သော် သူပြောသည့်အချက်မှာ အမှန်တရား ဖြစ်နေသဖြင့် ပရိယာယ်ဖြင့် ပြောဆိုရခြင်းမှာလည်း အတော်ပင် ဖိအားများလှသည်။

ရိုးသားလှသော ယွမ်ဟိုလင်းသည် အစိုးရနှင့် ပူးပေါင်းပြီး သူ့ကို 'ဆရာကြီး' တစ်ဦးအဖြစ် လိုက်လံရှာဖွေမလား ဆိုသည်မှာမူ ချူးဟွေ့ အနေဖြင့် အချိန်မရွေး ထွက်ပြေးပုန်းရှောင်ရန် ပြင်ဆင်ထားရုံသာ ရှိတော့သည်။

နောင်တစ်ချိန် ကမ္ဘာပျက်ကပ်ထဲတွင် ယွမ်ဟိုလင်းသည် သူ၏ အသင်းဖော် ဖြစ်လာမည် မဟုတ်တော့သော်လည်း ယခုမူ သူသည် အရင်ဘဝက အသက်ကယ်တင်ခြင်း ကျေးဇူးကို ဆပ်ပြီးပြီဟု မှတ်ယူလိုက်သည်။

"သုံးရက်အတွင်း ပစ္စည်းတွေ ရောက်စေရမယ် "

ယွမ်ဟိုလင်းမှာ ပြတ်သားသူ ဖြစ်သည်။ သူ ခဏမျှ စဉ်းစားပြီးနောက် ခေါင်းညိတ် သဘောတူလိုက်သည်။ ချူးဟွေ့၏ ဟောကိန်းများမှာ မယုံနိုင်စရာ ဖြစ်နေသော်လည်း တစ်ဖက်လူက နောက်ပြောင်နေခြင်း မဟုတ်ကြောင်း သူ၏ ပင်ကိုယ်အသိက ပြောနေသည်။ ထို့အပြင် တစ်ဖက်လူက 'ရှောင်ကျဲ' တည်ရှိမှုကို သိနေသည်ဖြစ်ရာ ရှောင်ကျဲကို ကာကွယ်ရန်အတွက် ဤကတိကို မတည်ရုံမှအပ အခြားနည်းလမ်းမရှိပေ။

အကယ်၍ တစ်ဖက်လူပြောသည်မှာ အမှန်ဖြစ်ခဲ့လျှင်လည်း အခြားတစ်ဖက်မှ ကြည့်ပါက ဤကိစ္စမှာ ကြီးမြတ်သော အလုပ်တစ်ခုပင် မဟုတ်ပါလား။

အမှန်လား၊ အမှားလား ဆိုသည်မှာမူ ရှေ့လာမည့် လအနည်းငယ်အတွင်း ဖြစ်ပျက်မည့် သတင်းများကို ကြည့်လျှင် သိရပေလိမ့်မည်။

သို့သော် ယွမ်ဟိုလင်းသည် စိတ်မချနိုင်သေးသဖြင့် တရုတ်ပြည်ရှိ သူ၏ချစ်သူကို ချက်ချင်း ဆက်သွယ်ခဲ့သည်။ နောက်ဆုံးတွင် တစ်ဖက်လူမှာ အမှန်တကယ် ပြဿနာမရှိကြောင်း အတည်ပြုနိုင်ခဲ့ပြီးနောက် သူနှင့် သူ၏ချစ်သူသည် ထိုအမည်မဖော်လိုသော စာအကြောင်းကို ခဏတာ မေ့လျော့ထားလိုက်ကြသည်။

ချင်းရှောင်ကျဲသည်လည်း ထိုစာပါ အကြောင်းအရာများကို မယုံကြည်သော်လည်း "အကယ်၍များ အမှန်ဖြစ်နေခဲ့ရင်" ဟူသော စိုးရိမ်စိတ်တော့ ရှိသည်။ အကယ်၍ အမှားဖြစ်ခဲ့လျှင်လည်း နောက်ပြောင်မှုတစ်ခုအဖြစ်သာ သဘောထားလိုက်မည်၊ သူကဲ့သို့ ဟက်ကာတစ်ဦးအတွက် ဘာမှ ဆုံးရှုံးစရာ မရှိပေ။

အရောင်းအဝယ် ပြီးမြောက်သွားပြီးနောက် သူတို့နှစ်ဦး လမ်းခွဲခဲ့ကြသည်။

သုံးရက်အကြာတွင် ယွမ်ဟိုလင်းသည် ဆိပ်ကမ်းတစ်ခု၌ ချူးဟွေ့ထံသို့ ပစ္စည်းများကို လွှဲပြောင်းပေးအပ်ခဲ့သည်။

ပစ္စည်းများ၏ အရေအတွက်နှင့် အရည်အသွေးမှာ သူ တောင်းဆိုသည်ထက် အဆပေါင်းများစွာ သာလွန်နေသဖြင့် တစ်ဖက်လူ၏ ရက်ရောမှုကို သိသာစေသည်။

ချူးဟွေ့သည် အလွန်ပင် စိတ်ကျေနပ်သွားပြီး ယွမ်ဟိုလင်းကို တရုတ်ပြည်သို့ အမြန်ပြန်ရန် နောက်တစ်ကြိမ် သတိပေးလိုက်သည်။ ထို့နောက် သူသည် ယွီခဲ့ကို ခေါ်ဆောင်ကာ ပင်လယ်ပြင်သို့ ထွက်ခွာခဲ့ပြီး၊ အခြားမြို့တစ်ခုသို့ သွားရောက်၍ လေယာဉ်ပြောင်းစီးကာ နေရပ်သို့ ပြန်ခဲ့သည်။ ထို့နောက် အချိန်နှင့်တစ်ပြေးညီ အထောက်အပံ့ပစ္စည်းများ စုဆောင်းခြင်းကို စတင်တော့သည်။

ယွမ်သန်းငါးဆယ် ဆိုသည်မှာ များပြားပုံရသော်လည်း အမှန်တကယ် အသုံးပြုသည့်အခါ အလွန်ပင် နည်းပါးလှသည်။ ပြင်ဆင်ချိန်ကာလကို အကျိုးအရှိဆုံး အသုံးချနိုင်ရန် ချူးဟွေ့သည် အဝတ်အစား၊ အစားအစာနှင့် သွားလာရေးဟူသော အချက်ကြီး သုံးချက်ကို အခြေခံ၍ စတင်ခဲ့သည်။

သူသည် ပထမဆုံး ဂျာမနီနိုင်ငံသို့ သွားရောက်ကာ ကားကုမ္ပဏီတစ်ခု၌ ကားနှစ်စီး မှာယူခဲ့သည်။ အပြင်ပန်း အလှအပထက် ကြံ့ခိုင်ကျောပိုးမှုနှင့် တောင့်တင်းခိုင်မာမှုကိုသာ အဓိကထား၍ မှာယူခဲ့ခြင်း ဖြစ်သည်။ ဂျာမနီထုတ် ကားများသည် နည်းပညာ၊ ဘေးကင်းလုံခြုံမှုနှင့် တောင့်တင်းမှုတို့တွင် ကမ္ဘာကျော်သည်ဖြစ်ရာ ဤကဲ့သို့ ကားမျိုးမှာ မရှိမဖြစ် လိုအပ်လှသည်။

ကားနှစ်စီးအတွက် ငွေပေးချေပြီးသောအခါ သူ၏ လက်ထဲ၌ ငွေများစွာ လျော့နည်းသွားခဲ့သည်။

ထို့နောက် ကျန်ရှိသည့် ပစ္စည်းများအတွက် ချူးဟွေ့သည် ဦးနှောက်ခြောက်မတတ် သေချာစွာ တွက်ချက်ရတော့သည်။

အစားအစာအတွက် အသားများကို အမြောက်အမြား ပြင်ဆင်ရန် မလိုပေ။ ကမ္ဘာပျက်ပြီးနောက်ပိုင်းတွင် မျိုးပြောင်းသတ္တဝါများ ၏ အသားများ ရှိနေမည် ဖြစ်ရာ၊ ကျွမ်းကျင်မှုသာ ရှိလျှင် အသားစားရန် မပူရပေ။ ထို့ကြောင့် သူသည် နွား၊ သိုး၊ ကြက်၊ ဘဲ အစရှိသည်တို့ကို အနည်းငယ်သာ ဝယ်ယူခဲ့သည်။

သို့သော်လည်း ကြက်ခြေထောက်၊ ဘဲခြေထောက်နှင့် တိရစ္ဆာန် ကလီစာများမှာ နိုင်ငံခြားသားများ မစားကြသဖြင့် ဈေးနှုန်းမှာ အလွန်ပင် ချိုသာလှသည်။ ဈေးပေါသည်ကို အခွင့်ကောင်းယူကာ space ထဲတွင် နေရာအများကြီး မယူစေရန် သူသည် အမြောက်အမြား ဝယ်ယူခဲ့သည်။

ဤအရာများသည် အသားခြောက်များ ဝါးနေရသည်ထက် အဆပေါင်းများစွာ ပို၍ အရသာရှိလှသည်။

ပစ္စည်းများ ဝယ်ယူပြီးနောက် ချူးဟွေ့သည် ရင်ထဲ၌ ဝမ်းသာအားရ အော်ဟစ်မိသည်။ မိမိနိုင်ငံ၏ အစားအသောက် ယဉ်ကျေးမှုသည် မည်မျှပင် နက်ရှိုင်းကျယ်ဝန်းလှပါသနည်း။ ဤကဲ့သို့ အရသာရှိလှသော အရာများကို အမှိုက်ကဲ့သို့ သဘောထားနေကြသော ဤနိုင်ငံခြားသားများသည် ပစ္စည်းကောင်းကို မသိကြပါတကား!

ယွီခဲ့ကမူ နိုင်ငံချစ်စိတ်ထက် အစားအသောက် အမြောက်အမြား ဝယ်ယူရသည်ကိုသာ ပို၍ စိတ်လှုပ်ရှားနေ၏။

ခေတ်သစ်လောက၏ မုန့်ပဲသရေစာ အမျိုးမျိုးသည် ရှေးခေတ်မှ ရောက်လာသော "တောသားလေး" ဖြစ်သူ သူ့ကို အလွန်ပင် အံ့အားသင့်စေခဲ့သည်။

ချူးဟွေ့သည် သူ၏ စားချင်စဖွယ် အမူအရာလေးကို ကြည့်ကာ လမ်းဘေးစာ အမျိုးမျိုးကိုလည်း ဝယ်ယူပေးခဲ့သည်။ နောင်တွင် ဤနောက်လိုက်လေးကို ကျွေးမွေးရန် ဖြစ်သည်။ အသားများအပြင် လူသားတို့အတွက် မရှိမဖြစ်လိုအပ်သည်မှာ ဝမ်းဗိုက်ကို ပြည့်တင်းစေမည့် အဓိက အစားအစာများပင် ဖြစ်သည်။

ပစ္စည်းများ မဝယ်ယူမီ ချူးဟွေ့သည် အင်တာနက်တွင် အချက်အလက်များ ရှာဖွေကာ ပြည်တွင်း၊ ပြည်ပ ဈေးနှုန်းများကို နှိုင်းယှဉ်ခဲ့သည်။ ထို့နောက် ဂိုဒေါင်တစ်ခု ငှားရမ်းကာ လက်ကားဒိုင်များနှင့် ဆက်သွယ်တော့သည်။ ဆန်၊ ဂျုံ၊ ဆီ အစရှိသော အခြေခံရိက္ခာများအပြင် ခေါက်ဆွဲခြောက်၊ ပေါင်မုန့်၊ ကိတ်မုန့်နှင့် မုန့်အမျိုးမျိုးကိုလည်း အမြောက်အမြား ဝယ်ယူခဲ့သည်။

ချက်ချင်း စားသုံးနိုင်သော အစားအစာများနှင့် အသင့်စား အစားအစာများကို အဓိကထား ဝယ်ယူခဲ့သည်။ ကမ္ဘာပျက်ကပ်အတွင်း လှည့်လည်သွားလာချိန်တွင် မိနစ်အနည်းငယ်အတွင်း ဗိုက်ဆာမှုကို ဖြေဖျောက်ပေးနိုင်သော ဤကဲ့သို့ အစားအစာမျိုးမှာ မရှိမဖြစ် လိုအပ်လှသလို၊ လက်ဆောင်ပေးရန်အတွက်လည်း အလွန်ပင် အဖိုးတန်လှသည်။

ထို့ကြောင့် ချူးဟွေ့ မှာယူသည့်အခါ ထုပ်ပိုးမှုများကို ရိုးရှင်းစေရန်၊ ထုတ်လုပ်သည့်ရက်စွဲ သို့မဟုတ် ပုံကားချပ်များ မပါရှိစေရန်နှင့် အကြည်ရောင် ထုပ်ပိုးမှုများ ဖြစ်စေရန် မှာကြားခဲ့သည်။ ဤတောင်းဆိုချက်မှာ ထူးဆန်းလှသော်လည်း သူက ငွေကို ရက်ရက်ရောရော ပေးချေထားသဖြင့် ထုတ်လုပ်သူများကလည်း အပိုမေးခွန်းများ မမေးတော့ပေ။

ချူးဟွေ့သည် လက်ကားဒိုင် အသေးစားများကိုသာ ရွေးချယ်ဆက်သွယ်ခဲ့သည်။ လက်ကားဒိုင် အကြီးစားများအတွက် သူ၏ အမှာစာမှာ သေးငယ်သော်လည်း၊ လက်ကားဒိုင် အသေးစားများအတွက်မူ သူသည် ဖောက်သည်ကြီး ဖြစ်နေသဖြင့် သူ၏ တောင်းဆိုချက်များကို အစွမ်းကုန် ဖြည့်ဆည်းပေးကြသည်။

ထို့အပြင် ချောကလက်၊ သကြားလုံးနှင့် နိုင်ငံခြားဖြစ် မုန့်အမျိုးမျိုး၊ သစ်သီးထူးများကိုလည်း သူ လက်လွတ်မခံခဲ့ပေ။ ယွီခဲ့၏ ဆန်းပြားသော တောင်းဆိုချက်များကြောင့် သူသည် နို့မှုန့်၊ နို့နှင့် ကလေးအစားအစာများကိုလည်း အမြောက်အမြား စုဆောင်းခဲ့သည်။ ထိုသို့ စုဆောင်းရခြင်းမှာ အနည်းငယ် အဓိပ္ပာယ်မရှိသလို ခံစားရသော်လည်း၊ ကမ္ဘာပျက်ပြီးနောက် အခြေစိုက်စခန်းများ၌ မွေးကင်းစကလေးများ ရှိလာမည်ဖြစ်ရာ ၎င်းတို့ကို အခြားပစ္စည်းများနှင့် လဲလှယ်ရန် အသုံးပြုနိုင်သဖြင့် အလဟဿ မဖြစ်နိုင်ပေ။

ဝယ်ယူစရာများ ပြည့်စုံလုနီးပါး ဖြစ်လာသောအခါ ချူးဟွေ့သည် ဆေးကုမ္ပဏီအချို့သို့ သွားရောက်ကာ နေ့စဉ်သုံးဆေးဝါးများ၊ ကယ်လ်စီယမ်အားဆေးများ၊ ဆေးဘက်ဆိုင်ရာ အရက်ပြန်၊ ပတ်တီးနှင့် အခြားဆေးဝါးများကို ဝယ်ယူခဲ့သည်။

နောက်ဆုံးတွင် အထည်ချုပ်စက်ရုံ အသေးစားတစ်ခုသို့ သွားရောက်ကာ အဝတ်အစား၊ စောင်၊ ဖိနပ်နှင့် အခြားဝတ်စုံများကို မှာယူခဲ့သည်။

ထို့နောက်မှသာ သူသည် ယွီခဲ့ကို ခေါ်ဆောင်ကာ ပင်လယ်ကမ်းခြေသို့ သွား၍ ရွက်လှေတစ်စင်း ငှားရမ်းကာ ဝေးလံသော ကျွန်းတစ်ကျွန်းသို့ မောင်းနှင်သွားခဲ့သည်။ထိုနောက် ထိုနေရာတွင် ပင်လယ်စာများကို ရူးသွပ်မတတ် စတင်စုဆောင်းတော့သည်။ ပင်လယ်စာနှင့် ရေထွက်ပစ္စည်းများသည် ကမ္ဘာပျက်ကပ်ကြောင့် မျိုးသုဉ်းသွားမည့် အရာများ ဖြစ်သဖြင့် နောင်တွင် အဆင့်မြင့် အရာရှိကြီးများပင် စားရရန် ခဲယဉ်းလှသည်။

ကမ္ဘာပျက်နှောင်းပိုင်းကာလတွင် ဤအရာများကို စားချင်ခြင်းမှာ စိတ်ကူးယဉ်အိပ်မက်မျှသာ ဖြစ်ပြီး မွေးမြူထားသော ငါးအနည်းငယ်ကိုသာ တွေ့နိုင်ပေလိမ့်မည်။

ချူးဟွေ့သည် ပင်လယ်စာကို အလွန်ကြိုက်နှစ်သက်သူ ဖြစ်သော်လည်း ၎င်းတို့မှာ ဈေးကြီးလှသည်။ သူ၏ ငွေများကို စနစ်တကျ သုံးစွဲရမည်ဖြစ်ရာ နေရာလွတ်၏ အားသာချက်ကို အသုံးချ၍ ပင်လယ်ထဲတွင် ကိုယ်တိုင်ကိုယ်ကျ လိုက်လံစုဆောင်းရန် ဆုံးဖြတ်ခဲ့ခြင်း ဖြစ်သည်။ ငွေကို ချွေတာနိုင်သမျှ ချွေတာရမည် မဟုတ်ပါလား။