Chapter ( 20 )

ဒင်းကျန်းကို ခေါ်ဆောင်လာခဲ့ပြီးနောက် ဒုတိယမြောက်နေ့တွင်တော့ အပြင်ဘက်ရှိ လမ်းပန်းဆက်သွယ်ရေးနှင့် လူအဝင်အထွက် အားလုံးကို တင်းကျပ်စွာ ပိတ်ပင်တားမြစ်လိုက်တော့သည်။

ထိုနေ့ညမှာပင် သူတို့ထံသို့ ရင်းနှီးကျွမ်းဝင်သူ နှစ်ဦးဖြစ်သည့် ယွမ်ဟိုလင်းနှင့် ချင်းရှောင်ကျဲတို့ ထပ်မံရောက်ရှိလာကြသည်။

ချူးဟွေ့သည် ချင်းရှောင်ကျဲကို မသိသော်လည်း ယွမ်ဟိုလင်းကိုမူ ကောင်းကောင်းသိရှိထားပေရာ တစ်ဖက်လူ၏ လက်ကိုရင်းရင်းနှီးနှီး ဖက်တွယ်ထားသူမှာ ၎င်း၏ ချစ်သူသာ ဖြစ်ရပေမည်။

သို့မဟုတ်ပါက အမျိုးသားနှစ်ဦး သူငယ်ချင်းအဖြစ်နှင့် ယခုကဲ့သို့ လက်တွဲထားကြသည်မှာ ပုံမှန်မှ မဟုတ်ဘဲလေ။

ပါရမီရှင် ဟက်ကာရုပ်သွင်နှင့်မတူဘဲ ယွမ်ဟိုလင်း၏ချစ်သူ ချင်းရှောင်ကျဲမှာ အသက်သိပ်မကြီးသေးဘဲ ယွီခဲ့နှင့် အသက်ချင်း မတိမ်းမယိမ်း၊ အလွန်ဆုံးရှိမှ ၁၇ နှစ်၊ ၁၈ နှစ်အရွယ် လူငယ်လေးတစ်ဦးသာ ဖြစ်သည်။ ထိုကောင်လေးမှာ အလွန်ချစ်စရာကောင်းသော်လည်း စရိုက်ကမူ အလွန်အမင်း ကြောက်တတ်လှပြီး ယွမ်ဟိုလင်း၏ အနောက်တွင် ယုန်ငယ်လေးတစ်ကောင်ကဲ့သို့ ပုန်းအောင်းနေခဲ့သည်။

သူကတော့ အပြင်ပန်းတွင်သာ အန္တရာယ်မရှိဘဲ သနားစရာကောင်းသယောင် ရှိသော်လည်း တကယ့်လက်တွေ့တွင်မူ လည်ပတ်ဖျတ်လတ်ပြီး သတ္တိခဲကြီးဖြစ်သည့် ယွီခဲ့နှင့် လုံးဝမတူပါချေ။ ယွီခဲ့ကမူ ယုန်သားရေခြုံထားသည့် ဝံပုလွေလေးတစ်ကောင် မဟုတ်ပါလား။

"မစ္စတာချူ... ဒါက ကျွန်တော့်ရဲ့ချစ်သူ ရှောင်ကျဲပါ။ ဒီနေ့ ကျွန်တော် ခင်ဗျားဆီလာတာ တစ်ခုခု တိုင်ပင်ချင်လို့ပါ..."

ယွမ်ဟိုလင်းက တံခါးဝတွင် ရပ်နေရင်း သူ၏ချစ်သူကို အနောက်မှာ ကာကွယ်ထားပေးလေသည်။ အရပ် ၁.၉ မီတာ (ခြောက်ပေကျော်) ခန့် ရှိသော ထိုလူသန်ကြီး၏ မျက်နှာထက်တွင်မူ အနည်းငယ် စိုးရွံ့တုန်လှုပ်နေသည့် အရိပ်အယောင်များ သန်းနေခဲ့သည်။

"အထဲဝင်ပြီးမှ အေးအေးဆေးဆေး ပြောကြတာပေါ့"

ချူးဟွေ့ တစ်ဖက်လူတွင် အထုပ်အပိုးများနှင့် ကျောပိုးအိတ်တစ်လုံးကို သယ်ဆောင်လာသည်ကို မြင်လိုက်ရုံနှင့်ပင် သူတို့ ဘာအတွက် လာခဲ့ကြသည်ကို ချက်ချင်း ရိပ်မိသွားတော့သည်။ သူက ပြုံးလိုက်ပြီး သူတို့ကို အထဲဝင်ရန် တံခါးဖွင့်ပေးလိုက်သည်။

အစိုးရကိုယ်တိုင်ကပင် သူ၏ ပရောဖက်ပြုချက်စာစောင်ကို ယုံကြည်နေကြပြီဖြစ်ရာ အကြောင်းပြချက်မရှိဘဲ ယွမ်ဟိုလင်းအနေဖြင့် သံသယဝင်နေစရာ အကြောင်းမရှိတော့ချေ။ ယခုကဲ့သို့ အိတ်ကိုကိုယ်စီဆွဲကာ သူ၏ချစ်သူကို ခေါ်ဆောင်လာခဲ့သည်ဆိုမှတော့ သူ့အဖွဲ့ထံသို့ လာရောက်ခိုလှုံခြင်းမှတစ်ပါး အခြားဖြစ်နိုင်ခြေ မရှိတော့ပါချေ။

ချူးဟွေ့၏ ခန့်မှန်းချက်က မှန်ကန်လှပေသည်။ ယွမ်ဟိုလင်းသည် တကယ်ပင် သူ့ထံသို့ လာရောက်ပူးပေါင်းရန် လာခဲ့ခြင်း ဖြစ်သည်။

ပရောဖက်ပြုချက်စာစောင်ထဲက အကြောင်းအရာများ တစ်ခုပြီးတစ်ခု တကယ်ဖြစ်လာသည်ကို မြင်တွေ့ရပြီးနောက် ယွမ်ဟိုလင်းမှာ အလွန်အမင်း စိတ်မရှည် ဖြစ်နေခဲ့ရသည်။

အကယ်၍ ကမ္ဘာပျက်ကပ်ကြီး တကယ်ဆိုက်ရောက်လာပါက သူသည် မည်မျှပင် သန်မာထွားကျိုင်းနေပါစေ သာမန်လူတစ်ဦးသာ ဖြစ်နေဦးမည်ဖြစ်ရာ ကြီးမားလှသော ဘေးဒုက္ခဆိုးကြီးများရှေ့မှောက်တွင် မိမိကိုယ်ကိုယ် ကာကွယ်ရန်ပင် ခက်ခဲလှပေလိမ့်မည်။ သို့ဆိုလျှင် သူ၏ အသက်ထက်ချစ်ရသော ချစ်သူကို မည်သို့လျှင် ကာကွယ်စောင့်ရှောက်နိုင်ပါမည်နည်း။

သူ့တွင် ကြီးကြီးမားမား ရည်မှန်းချက်ကြီးများ မရှိပါချေ။ သူက ရှောင်ကျဲနှင့်အတူ ဘဝကို နှစ်ယောက်တည်း ဆိတ်ငြိမ်ပြီး ပျော်ပျော်ရွှင်ရွှင် ဖြတ်သန်းသွားချင်ရုံမျှသာ ဖြစ်သည်။

ထို့ကြောင့် အဖက်ဖက်မှ သေချာစွာ စဉ်းစားတွက်ချက်ပြီးနောက် ယွမ်ဟိုလင်းသည် ချူးဟွေ့ကို သတိရမိသွားခြင်း ဖြစ်သည်။ ချူးဟွေ့အနေဖြင့် ကမ္ဘာပျက်ကပ်ကြီး ရောက်လာတော့မည်ကို ကြိုတင်ခန့်မှန်းနိုင်သည်ဆိုကတည်းက ထိုတစ်ဖက်လူတွင် သာမန်ထက်ထူးကဲသော စွမ်းဆောင်ရည် ရှိနေလိမ့်မည်ဟု သူ တွေးမိသည်။

အကယ်၍ သူတို့သာ ထိုသူထံတွင် လာရောက်ခိုလှုံနိုင်ပါက ဘေးကင်းလုံခြုံလိမ့်မည်ဟု ရာနှုန်းပြည့် အာမခံချက်မရှိလျှင်ပင်... ဘေးဒုက္ခဆိုးကြီးများကို ရင်ဆိုင်ရင်း အသက်ရှင်ကျန်ရစ်နိုင်မည့် အခွင့်အလမ်းမှာ သူတို့ဘာသာသူတို့ ပုန်းအောင်းနေကြခြင်းထက် များစွာ ပို၍ စိတ်ချရပေလိမ့်မည်။

ချူးဟွေ့သည် သေဘေးအန္တရာယ် ရှိနေသည်ကို သိလျက်နှင့် စွန့်စားကာ အစိုးရထံသို့ ‘ကမ္ဘာပျက်ကပ် ပရောဖက်ပြုချက်’ ကို ပေးပို့ပြီး ကြိုတင်ပြင်ဆင်မှုများ ပြုလုပ်စေခဲ့ခြင်းကို ကြည့်ခြင်းအားဖြင့်... ထိုတစ်ဖက်လူသည် စိတ်ရင်းစေတနာကောင်းရှိပြီး လူကြီးလူကောင်းဆန်သူတစ်ဦး ဖြစ်ကြောင်း ထင်ရှားလှပေသည်။

ထိုအကြောင်းအရာများကို အပြန်အလှန် တွေးတောပြီးနောက်တွင်တော့ ယွမ်ဟိုလင်းတစ်ယောက် ရဲရင့်ပြီး စွန့်စားမှုကြီးလှသော ဆုံးဖြတ်ချက်တစ်ခုကို ချမှတ်လိုက်တော့သည်။

ရိုးရှင်းလှသော ညစာကို အတူတူ စားသောက်ပြီးနောက်တွင်တော့ သူသည် ချူးဟွေ့၏အနောက်ကနေ အခန်းထဲသို့ လိုက်ပါသွားခဲ့ပြီး ၎င်းတို့နှစ်ဦးတည်း သီးသန့်စကားပြောဆိုရန် ပြင်ဆင်လိုက်ကြသည်။

အခန်းထဲသို့ ရောက်သည်နှင့်တစ်ပြိုင်နက် ယွမ်ဟိုလင်းက စကားများများပြောမနေတော့ချေ။ လုံခြုံမှုရှိစေရန်အတွက် လိုက်ကာများကို ဆွဲပိတ်လိုက်ပြီးနောက် ချူးဟွေ့၏ ရှေ့မှောက်တွင်ပင် သူ၏လက်ကို ဝေ့ယမ်းလိုက်ရာ... သစ်သီးဝလံများနှင့် စားစရာ ရိက္ခာအပြွတ်အသိပ်မှာ ဟာလာဟင်လင်းပြင်ထဲမှနေ၍ အလိုအလျောက် ထွက်ပေါ်လာတော့သည်။

ထုတ်ယူလိုက်သည့် ပစ္စည်းပမာဏမှာ အလွန်များပြားလှရာ ၎င်းကို သိုလှောင်ထားသည့် အာကာသဟင်းလင်းပြင်မှာလည်း ထုထည်ပမာဏ တော်တော်လေး ကြီးမားလိမ့်မည် ဖြစ်သည်။ မည်သည့် မျက်လှည့်ပြကွက် ကိရိယာမှမရှိဘဲ ‘ဟင်လင်းပြင်ထဲကနေ ပစ္စည်းများ ထုတ်ပြခြင်း’ ဆိုသည့် အတတ်ပညာမျိုးကို ဖော်ထုတ်ရန်မှာ ဘယ်လိုမှ မဖြစ်နိုင်ပါချေ။

ချူးဟွေ့၏ မျက်ခွံများမှာ တစ်ချက်မျှ လှုပ်ခတ်သွားရသည်။ ယွမ်ဟိုလင်းတွင်လည်း ထူးဆန်းသော သိုလှောင်ခန်းတစ်ခု ရှိနေသည်မှာ အထင်အရှားပင်။

ဤအရာက ဆန်းကြယ်လှသည်တော့ မဟုတ်ပေ။ ကမ္ဘာပျက်ကပ်အတွင်း၌ မြင့်မားလှသော ဝိညာဉ်ရေးရာ တာအိုအတတ်ပညာကို တတ်မြောက်ထားကြသဖြင့် ယခုကဲ့သို့သော သိုလှောင်ခန်းမျိုးကို ဖန်တီးနိုင်သည့် ထူးခြားဆန်းပြားသော လူစွမ်းကောင်းများစွာ ရှိကြသည်။

ဒဏ္ဍာရီများအရ လွန်ခဲ့သော ကာလများက စုန်းကဝေအတတ်ပညာရှင်များ ထွန်းကားခဲ့သည့်ခေတ်တွင် ဤကဲ့သို့သောအရာများမှာ အလွန်ခေတ်စားခဲ့ဖူးသည်ဟု ဆိုကြသည်။ အချို့သောသူများမှာ မိမိတို့၏ ဘိုးဘေးဘီဘင်များထံမှတစ်ဆင့် ဤကဲ့သို့သော အမွေအနှစ်များကို ဆက်ခံရရှိထားကြခြင်းဖြစ်ရာ အံ့ဩနေစရာ မလိုတော့ပေ။

သူ့ရှေ့တွင်ရှိနေသော ယွမ်ဟိုလင်းသည်လည်း မိမိ၏ ရည်ရွယ်ချက်ကို ဖုံးကွယ်ထားခြင်းမရှိဘဲ တည်ငြိမ်သော မျက်နှာထားဖြင့် ရှင်းပြလာခဲ့သည်။

"မစ္စတာချူး... မင်း မြင်တဲ့အတိုင်းပါပဲ၊ ကျွန်တော့်မှာ ဝတ္ထုတွေထဲမှာ ပါလေ့ရှိတဲ့ သယ်ဆောင်ရလွယ်ကူတဲ့ သိုလှောင်ခန်းတစ်ခု ရှိတယ်။ အကျယ်အဝန်းက သိပ်မကြီးမားလှတဲ့အပြင် ပစ္စည်းတွေကိုလည်း ထာဝရ မပျက်စီးအောင် သိုလှောင်ထားနိုင်တာမျိုးတော့ မဟုတ်ဘူး၊ အစားအစာတွေ ပုပ်သိုးမသွားအောင် အချိန်ဆွဲထားပေးရုံပဲ တတ်နိုင်တာ။ ဒါပေမဲ့ လူခြောက်ယောက်၊ ခုနစ်ယောက်လောက်ကို ငါးနှစ်စာ သုံးဆောင်နိုင်ဖို့အတွက် သေချာပေါက် အာမခံနိုင်လောက်အောင်တော့ ကျယ်ဝန်းပါတယ်။ အထဲမှာ သိုလှောင်ထားတဲ့ ပစ္စည်းတွေကို မစ္စတာချူး သဘောတူမယ်ဆိုရင် ကျွန်တော် အတူတူ မျှဝေသုံးစွဲဖို့ အသင့်ပါပဲ။ ဒါပေမဲ့ ကတိတစ်ခုအနေနဲ့ကတော့ မစ္စတာချူးက ကျွန်တော်နဲ့ ရှောင်ကျဲရဲ့ ဘေးကင်းလုံခြုံမှုကို အာမခံပေးနိုင်ဖို့ မျှော်လင့်ပါတယ်..."

ပွင့်ပွင့်လင်းလင်း ပြောရမည်ဆိုပါက ယွမ်ဟိုလင်းသည် ဤသိုလှောင်ခန်းကို အသုံးချကာ ‘အထက်လူကြီး’ တစ်ဦး၏ အရိပ်အာဝါသအောက်တွင် ခိုလှုံခွင့်ရရှိရန်အတွက် လဲလှယ်ရန် စီစဉ်နေခြင်းသာ ဖြစ်ပေတော့သည်။

စွမ်းရည်က မည်မျှပင် ထက်မြက်သည်ဖြစ်စေ၊ မိမိကိုယ်တိုင်က မသန်မာပါက ကမ္ဘာပျက်ကပ်ကြီး ဆိုက်ရောက်ပြီးနောက်တွင် သူတစ်ပါး၏ ပစ်မှတ်ထားခြင်းကိုသာ ခံရပေလိမ့်မည်။

ယွမ်ဟိုလင်းသည် ဤအချက်ကို သဲသဲကွဲကွဲ မြင်ထားသော်လည်း တစ်ပြိုင်နက်တည်းမှာပင် သူသည် ကြီးမားလှသော လောင်းကြေးတစ်ခုကို ထပ်၍ လောင်းကစားဆန်ဆန် စွန့်စားနေခြင်းလည်း ဖြစ်သည်။ မည်သူမျှ လူ့သဘာဝ စိတ်နေသဘောထားကို ကြိုတင်မခန့်မှန်းနိုင်သဖြင့် ယခုကဲ့သို့ လာရောက်ခြင်းမှာ ‘အသတ်ခံရပြီး အသုံးချခံရနိုင်သည့်’ အန္တရာယ်မျိုး ရှိနေသည်မဟုတ်ပါလား။

သို့သော်လည်း ယွမ်ဟိုလင်းက ချင်းရှောင်ကျဲကိုပါ တစ်ပါတည်း ခေါ်ဆောင်လာခဲ့ခြင်းကြောင့် သူသည် ထိုမျှအထိ စိတ်လိုက်မာန်ပါလုပ်တတ်သည့် လူစားမျိုးမဟုတ်ကြောင်း ချူးဟွေ့ သိရှိထားသည်။

"အကယ်၍ ငါက သဘောမတူဘဲ မင်းတို့ကို သတ်ပြီး ပစ္စည်းတွေ လုယူဖို့ ကြိုးစားရင်ကော... ဘာလုပ်ဖို့ စီစဉ်ထားလဲ"

"သုံးရက်အတွင်းမှာ မစ္စတာချူးရဲ့ ကိုယ်ရေးအချက်အလက်အားလုံး ကမ္ဘာ့ကွန်ရက်စာမျက်နှာပေါ်မှာ ပျံ့နှံ့သွားလိမ့်မယ်"

ယွမ်ဟိုလင်းက သူ၏ နောက်ဆုံးလက်နက်ကို ပွင့်ပွင့်လင်းလင်းပင် ထုတ်ဖော်ပြောဆိုလိုက်တော့သည်။

အကယ်၍ ‘ပရောဖက်’ ဆိုသည့် အထောက်အထားသာ လူသိရှင်ကြား ပေါက်ကြားသွားပါက ချူးဟွေ့သည် နိုင်ငံအသီးသီးက လုယက်ဖမ်းဆီးရန် ကြိုးပမ်းကြမည့် ပစ်မှတ်တစ်ခု ဖြစ်လာပေလိမ့်မည်။

ချူးဟွေ့ ကျေနပ်အားရစွာဖြင့် ပြုံးလိုက်မိသည်။ ဤသည်မှာ သူ ကောင်းကောင်းသိထားသည့် ယွမ်ဟိုလင်း၏ စရိုက်အမှန်ပင် ဖြစ်သည်။

သူ့အတွက်မူ ပြီးခဲ့သည့်ဘဝကတည်းကပင် သူတို့နှစ်ဦးမှာ အပြန်အလှန် သိကျွမ်းခဲ့ကြခြင်းဖြစ်သော်လည်း... ယွမ်ဟိုလင်းအတွက်မူ သူတို့သည် မကြာသေးမီကမှ အဆက်အသွယ်ရခဲ့ကြသည့် လူစိမ်းများသာ ဖြစ်ကြသေးသည်။

အကယ်၍ ယွမ်ဟိုလင်းသာ ယခုအချိန်တွင် သူ့ကိုရာနှုန်းပြည့် ပုံအောပြီး ယုံကြည်လာခဲ့ပါက ထိုသူ၏ ဉာဏ်ရည်ဉာဏ်သွေးကို သူ ပြန်လည်သုံးသပ်ရပေလိမ့်မည်။

‘ရန်သူက တော်နေမှာကို မကြောက်ရဘူး၊ ကိုယ့်အဖွဲ့သားက ငတုံးဖြစ်နေမှာကိုပဲ ကြောက်ရတယ်’ ဆိုသည့် စကားပုံအတိုင်း... လည်ပတ်လှည့်ဖြားတတ်သည့် လူလိမ်လူကောက်များနှင့် ပူးပေါင်းရခြင်းက ဦးနှောက်မရှိသည့် လူအများနှင့် လက်တွဲရခြင်းထက် များစွာ ပို၍ အဆင်ပြေလှပေသည်။

"ငါက ကမ္ဘာပျက်ကပ် ရောက်လာတော့မယ်ဆိုတာကို ကြိုတင်တွက်ချက်မိရုံတင်ပါ၊ အဲဒီလောက်ကြီးတဲ့ စွမ်းဆောင်ရည်မျိုး မရှိပါဘူး။ ငါတို့အားလုံး ဘေးကင်းလုံခြုံလိမ့်မယ်လို့လည်း ရာနှုန်းပြည့် အာမခံချက်မပေးနိုင်ဘူး။ ဒါပေမဲ့ ငါတို့ အတူတူ ပူးပေါင်းဆောင်ရွက်လို့တော့ ရတယ်။ လက်ရှိ တကယ့်အခြေအနေနဲ့ ပတ်သက်ပြီးတော့ အကိုယွမ်က ငါ့ထက်ပိုပြီး အချက်အလက်တွေ အများကြီး သိထားလိမ့်မယ်လို့ ထင်တယ်"

"ဟုတ်တယ်... အပြင်က အခြေအနေတွေက မင်း ခန့်မှန်းထားတာထက်တောင် ပိုပြီး ဆိုးရွားပြင်းထန်နေပြီ"

ယွမ်ဟိုလင်း၏ မျက်နှာထားမှာ တည်ကြည်လေးနက်သွားတော့သည်။